|
08. März 2009
Posted in
Beeri - Buech
Punggt 14:15 hets gheisse aadrätte im Radison. Wo mir in d’Garage sin go d`Instrumänt und d`Larve hole, sinn alli unseri Larve in 2 verschiedene Egge glääge.
Dr Patrick Hueter het nämlich hüt scho frieh aagfange und emol kontrolliert, ob bi allne d`Latärnli au wirklich lüchte. Bi dene wos nit gange isch het är mit neye Bierli oder e paar Schrubereie nochegholfe. An däre Stell dangge vyl mol Patrick fyr dini Larvewärkstatt.
Dr Florian Notter het au öbis luschtigs uff em Rugge ka. Nämlig e Brämsliecht (Plakatt) fyr e Leif, damit är bim Laufe vilicht weniger in ihn inne lauft. Bedohnig uff vilicht. Ich glaub, das Brämsliecht het nit vyl gnützt vor luter schnure wo dr Leif jo bekanntlich gärn duet.
Vor em Ablaufe het dr Dani uns au scho es Bsiechli mit Kamera abgstattet und den isch es jo au scho los gange zum erschte Ufftritt an däm Daag; nämlig im Grosse Saal vom Stadtcasino. Bim Stäge uffelaufe hets den au scho gheisse Achtung die Stäge isch rutschig nid das no eine e Unfall macht.
Noch äm Uftritt in däre Sauna wo zwar dr Schlag d`Blöser kuum ghört het und umgekehr hänn mir grad e Pause iiglegt zum uns abzkiehle.
Nochdäm mir uns vo däre Hitz erholt hänn, sinn mir abgloffe Richtig Claraplatz. Natürlig via Wettsteibrugg suscht wäre mir jo nie aahko. Vor em Volkshuus hets den e langi Pause gäh damit mir uns hänn kenne verpfläge und s`Triebe an dr Kinderfasnacht betrachte. Denn isch es au scho wieder witergange Richtig Mässeplatz, damit mir uns fyr e Stärnmärsch hänn kenne parat mache.
Pünktlich um 18:30 sin den d IG- & FG Guggene los gloffe. Jetzt hets au d‘Prob uffs Exämpel gäh ob jetzt alli Latärnli lüchte oder nit. Bi de Meischte hets glüchtet =) und so hänn mir uns im Volk wo d Guggene isch go luege kenne präsentiere.
Kum sinn mir bim Seibi aako het au scho d GSB als erschti Gugge uff dr Bühne gspielt. Alles nonemol richte und denn isch es sowyt gsi unser Gugge-Konzärt uff em Seibi. So schnäll wie mir uff dr Bühni gsi sinn so schnäll isch es au scho wieder verbi gsi. Unseri 3 Stückli Sunshine, Ohni di & dr Stärn sinn bim Publikum guet aakoo. Noch däne Yydrück vom Konzärt isch es scho bald witer gange zum Radsion. Dört hänn mir e Pause gmacht. Nach dr Pause sinn mir zur Milchbar an d Heuwoog gloffe, wo mir de Pumperniggel zu ihrem 60. e Ständeli brocht hänn. Nach em Ständeli und em obligate Aastosse hänn mir uns Richtig Barfi und den wieder zum Radison im Volk zeigt.
E Mänge het sich gfrogt isch das es deschavü oder sin mir erscht grad do gsi. Nach däre Pause isch es wieder gsterckt witer gange nämlich zu unserem Passiveapéro bim alte Stainlemer.
E paar Stückli schränze, eine näh und denn e grösseri Pause. Mit echli Verspötig sin d Schränz-Gritte zu uns gstosse und hänn eine für uns gspielt.
Uff die 2 sin mir zum Loge Keller marschiert um dört z‘spiele, wenns den hüt weniger lüt het. Dä Ufftritt isch worhaftig glunge, sodass mir eine gnoh hänn. So langsam isch s‘Ändi vom Fasnachtszyschig nöcher koo und es het es letschtsmol fyr dä Daag gheisse yystoh und ab richtig Radison, Instrumänt und Larve versorge und abträtte. Doch als mir us dr Garage uffe ko sin het do e kleini aber feini Gugge gspielt. D Tschäpperläggi. Das isch e schöne Schluss für dä glungeni Daag gsi.
