|
22. Juni 2010
Posted in
Beeri - Buech
Wo n ych do am Frytig morge uffstand und uff em wäg in d Kuuchi schnäll e bligg us em fänschter wirf, do han y so fir my dänggt "Scheibenkleister", dä setsch au widder emol abe butze. Nach em Kaffi und em dusche han y den gmerggt wo ni mit em Hund no schnäll ume n egge bi, das daas s wätter isch wo do alles eso drieb gmacht het... "Ojee," han ych mr dänggt. Y bi drno zueversichtlig und voller Optimismus ohni Schirm, Charme und Melone in richtig Bahnhof und ab ins gschäfft... Y ha den aigentlig dr ganz vormidaag drmit verbrocht s "Beeri Stoosgebätt" z murmle und lueg au do, d Sunne isch zwar nid gross ko giggsle, aber es het zemindescht uffgeert schiffe.
Will jo scho Frytig gsy isch, bin y den so geg e Mitdaag wieder in richtig hai, muesch jo vorbereitet sy oder, kasch jo nid aifach dr ganz daag im Stoole hogge und den zobe an d Erle-Schittlete go grampfe wie ne Muni...
Die erschte sin scho mol do gsy
es muess so geg die finfi gsy sy wo mir de ändligg in dr Lange-Erle gsy sin, es isch drogge gsy, e weneli kiehl, aber s het nimi grägnet. Dangg e baar Ainzel Maske isch au scho zimligg alles eso vorberaitet gsy das mr nimm lang bruucht hän zem s erschte Blonde aa zapfe und me hätis nid dängg, aber es isch vyyl aa zapft worde :) drotz em eher nid so durschtige wätter.
"Es ist sieben Uhr..."
den leehm mr doch die Spyyl in dr Lange-Erle aafoo, Pingtligg wie n e Schwiizer Uhr het unsere DJ Sag's em Däni unseri Gescht zer ninte Erle-Schittlete begriesst und scho emol groob s Brogramm fir dr Frytig bekannt gä. Denn wo när ebbe fertig worde isch, hän sich den scho d Fährlischiffli fir ihre ufftritt barat gmacht. D Fährischiffli e gmischti Gugge mit Männli und Wybli hän den grad so richtig vollgas geh. S Brogramm an dr dyysjeerige Erle-Schittlete, s Jagt ay highlight s näggscht und zwische drin hän sich d Bsuecher und Gäscht keene am Gliggsraad, oder an dr Stachelbar mit ere Tombola oder au Kulinarisch keene verweehne respegtiv verwyyle. Ebbe gfyyhlti 20 Minute nach de Fährlischiffli hän sich den d Tschäddärä us Lörrach barad gmacht und mit fullminantem Sound d Erle so richtig gschyttlet...
Am viertel ab nini sind den Sonate-Schlyffer mit ihrem ganz speziele Sound uffglofe und hän uns mit Läggerbisse fir e gheergang so richtig vrweehnt. Kurz, und y main wirkligg nur kurz druff sind den Gascht-gäber, d Stachelbeeri uff d Byhni ko, was nid alli so richtig mit bekoo hän, dr kneufall vom erschte Schlagzyyger isch den e Begriessigs-Ritual gsy ;), uff jedefall isch den au widder, was mr in dr zwischezyyt fascht vrgässe hän, widder e weneli Fuessball fieber uff e blatz koo. Im ibrige, kasch Du in dr Lange-Erle bim Parkrestaurant d WM Mätch uff gross Lienwand go luege. Mit em Uffmarsch hän sy scho zimligg druff hyygwisse das aigentligg d Erle-Schittlete zmizt wärend dr WM statt finde duet. Isch doch au egal s Final isch jo erscht am elfte Juli. Dr abschluss vom Frytig obe hän den nid wie aigentligg draditionel d Stachelbeeri gmacht sondern das Joor het me das e bitsi andersch gmanaged. Zem Abschluss vom Gugge dail sind den d Noote-Schysser uffgloofe und hän is mit eme gekonnte Mix us Jazzig, Bluesigem d Bsuecher und d Gäscht vrweehnt.
Denn isch s halt doch Kiehl worde..
und mr hän dr Frytig obe e bits friener als blaant keene beände und jo, kurz nach däm das sowyyt alles verruumt und barat gsy isch fir e zwaite daag het den au widder dr räge e bsiechli abgstadet.
