|
22. März 2011
Posted in
Beeri - Buech
Am zwei hämmr uns bim Schmiedehof versammlet uf em Wäg dert ane, het me scho kenne erkenne wie d’Stadt in kürzester Zyt wieder eimol meh vo de Kindr überno wird. Mir hän uns vrbi dränggt an Feen, Pippis, Uelis, Blätzlibajasse und e huffe Schyssdräggzüggli.
Gli druf abe simmr denn wie immer am Zyschtig im Stammgoschdym richtig Stadtcasino glooffe, wo mir wie jedes Johr unsere Gugge 46 Uftritt gha händ. Es isch so herrlich warm gsi, dass e paar vo uns, das warme Goschdym verflucht händ, Im Saal inne isch es denn so heiss gsi, dass uns nur no dr Schweiss abgloofe isch und mir alli froh gsi sind wo mr bim 2. Stiggli d’Larve abzieh hän deerfe.
Nacheme Sandwich und ebbis z’dringge isch es denn individuell zum Mässeplatz witr gange, will mir bi dr Stephie im Altersheim e Uftritt kha händ. Dr Mülli, wo das Joor notfallmässig igsprunge isch als Major het den au e blibende Iidrugg hintrlo und die ältere Dame in si Bann zoge.
Derno isch es witer gange wiedr an Mässeplatz wo mir uns allewyl träffe fir dr Stärnmarsch, vo derte zwische de Negro und de LäGGerli-HaGGer iklemmt an Barfi. Uf em Seibi hämmr denn dr Whiskey zum Beschte ghä und em Publikum hets gfalle.
Nachdäm phenomenale Uftritt ischs denn no ins Nelson Pub gange und drno am elfi z’nacht ab in Schmiedehof, wo mir unseri Passive mit eme Apéro hän deerfe verwehne.
Nochhär no e Rundi und denn am zwei am Morge offizielle Schluss.
Todmied simmr den ins Bett gheit.
