|
23. März 2011
Posted in
Beeri - Buech
Mir hän uns am Fasnachtmittwuch uf die 12:30Uhr im Hof vom Restaurant Schmiedehof troffe. S`Wätter isch leider nid so Traumhaft schön und warm gsy wie am Mäntig oder Zyschtig, aber es het nid gregnet :). Noch und noch in die erschte Beeri`s itroffe und hän sich was z`trinke gholt und ihr Instrument parat gmacht. Am 13:30Uhr hets den gheisse Ihstoh, Vorwärts Marsch. 
Uf dr Üssere Route richtig Barfi, Steine und Wettsteiplatz etc. S`isch nid lang gange und dr erschti grösseri Stau het sich ahkündet. S`isch nur sehr stockend vorwärts gange bis mir den uf höchi Kino Rex die erschti ungwollti Pause ihglegt hän, will nüd meh witter gange isch. Die erschte Beeri`s hän sich scho afoh nerve, will`s jedes Joor uf dr Üssere Route so viel Stau git. Nochere gschätzte Ewigkeit isch es den endli mol witter gange. Nach dem sich den au no d`Wiehlmys vor uns inne druckt hän, hän mir vor em erschte Comitee e spontans ständeli chönne gäh. Endli isch es den einigermase flüssig glofe und mir sin witter marschiert Richtig Wettsteiplatz, uf em Weg dört ahne, hät unsere Guggemajor nomol Pfiffe, nachdem dr Wirbel fertig gsy isch, isch`s vo de Trumpete und Posune zweistimmig cho dr Marine de Bâle und dr Fäährimaa :). Es het e kleins durenand gäh mit dr Stückliwahl. Au das cha mol passiere. Noch dem chleine Missgschick sin mir den bim zweite Comitee acho und hän dört nomol alles gäh. Endlich bim Wettsteiplatz acho, het`s e chli e längeri Pause gäh. Die einte hän dr Cortege gluegt, anderi sin ins warme und wieder anderi hän sich e Bier und öbis z`esse gholt zum sich Stärke vo dem ahstrengende räscht Cortege :). Kurz bevor mir den witterglofe sin, richtig Messeplatz-Claraplatz, zum sich no bim dritte Comitee z`präsentiere, hät`s den leider ahgfange regne. Dr letzt teil vom Cortege isch ohni Problem gange. Bim Claraplatz acho, hät unser Guggemajor nomol halt gmacht,me hät dr Schluss vom Cortege no verfolgt und den isch es au scho witter gange richtig Mohreloch. Bim Mohrloch acho, hät me sich vom Nase teil vom Goschtüm befreit :) und hät den s`feine z`Nacht chönne gniesse. S`Esse isch wie jedes Joor wieder Sensationell guet gsy. Punkt 19.30Uhr sin mir den wittergange richtig Märtplatz. Vo dört us, sin mir ufe zu dr Loge Clique und hän dört no e Ständeli gspielt. Nachere kurze Pause, in dere mir Bier becho hän, isch es den witter richtig Keeryy. Am 21:30Uhr hän mir im Keeryy e Uftritt kha. Zum chli mehr Lüüt ahzlocke, hän mir vor em Keeryy no dr Fährimaa zum beschte gäh. Leider hät`s nid viel mehr lüüt ahglockt. Im Keeryy inne acho, hän mir uns alli mieh gäh. Nach drei Lieder hän mir uns verabschiedet und sin wieder gange. S`hät nomol e Pause gäh, bevor mir den wieder in Barfi/ Desart drvo gloffe sin.
Uff dr dräppe vor em Des Art isch uns no zum ä Ständeli zmuet gsi und so sin mr den au dert uffglofe und hän bi doch trockene verhältnis drei gspielt. Uii.. jetzt han ich no überzoge, s het wärend em ständeli zwölfi gschlage und dr Ändstraich wird vo mim Kolleg gschriibe...
Dim lights Embed Embed this video on your site
