|
24. März 2011
Posted in
Beeri - Buech
Punggt zwölfi in dr nacht s isch donschtig und s goht ufe ändstreich zue, hogge 3 glatti gwärgschafter und e nid weniger glatte aber vomene fremdregister (unseri seggretärin isch heigange,denn darf me au diräkt zu uns cho;-) bim cafi des arts bimene bierli im schäärme vor däm fiise rääge. D stimmig isch guet und amüsiert luege mr zue wie d dambuure und anderi gugge friinde em räge trotze und nomol alles us ihrne instrumänt usehole. Es wird au disgutiert unter anderem au über die arme chaibe in japan, eins söll gseit si die expärte hän das im griff gäll Roli?! 
Leider isch jedes Rugeli irgendwenn tilgt mir wän eigentlig nid ufstoh doch unsere dätschmeischter het uns uf die viertel vor 1 wider zum ihstoh befohle. Au wenn mr paar schönwättergüggeler drbi hän ihgstande sin alli und püngtlig wie es schwizer ührli simmer d freie stroos spielend abe marschiert. Zielort isch dr märtplatz wo unsere major s restaurant mövepick ahvisiert het. Nichts böses ahnend simer denn spiilend dört ihnegloffe und mir hän festgstellt dasses voll isch und die halbi belegschaft vonere bekannte gugge drin sitzt. Jää aber das sin jo au güggeler die finde doch das lessig wenn me für si spiilt, chönt me dängge. Öb sis lessig gfunde hän das sei mal dahingestellt, d cliquebrüedere wo au no dine gsässe sin hän uf jede fall dezänt ahdütet, dass si sehr sensibli ohre hän. I würd sage s isch nid so schlächt gsi au wenns baarne nid so wohl gsi isch. Ahfangs hämer au no e verlorene drumpeter imene lange graue mantel als zuehörer gha. Hmm dä isch denn ihgstande aber noch 5 minute scho wider bi uns ume tigeret, het sich verirrt wohrschins.
Uf jede fall simer denn use us däm partyrestaurant wo dr bär gsteppt het und sin bim märtplatz bliibe wo mr d märtfraueli erwartet hän.2 Stüggli hämer zäme gspiilt und i wurd sage chapeau für das mr das nie güebt hän zäme und um die uhrzit. Spöter het sich denn au usegstellt ,dass die märtwiibly und männli nid nur ähnlichi sache spiile sondern durchus au no glatti kumpane sin. Do isch me grad wider ins fasnachtsfieber zrugcho noch dere truurfiir vo vorhär, leider isch aber scho 3 am morge gsi und dr ändstreich isch in griffbari nöchi cho..
Grossi gümp het denn au unsere major nüm wele mache wo nomol hervorzhebe isch wie souverän är uns dirigiert het an dere fasnacht. Mir sin denn gmüetlich in schmiedehof übere disloziert und hän dört no eine zwei gnoh bises 10 vor 4ieri worde isch. Do mir aber nid die einzige gsi sin wo hän wele ändstreich mache im schmidehof hämer schnäll müesse e machtwort spräche, si hätes aber au so gmerkt das mir lüter sin und hän sich denn entschlosse ihre ändstreich amene andere ort z verbringe. Und für die Cliquefründe wo no knallhart drummlet hän obwohl si gmerkt hän dass mir aahfange spiile cha me au nur de huet zieh. Mir sin nämlig drvo usgange, dass die e riise lätsch ziehn aber siehe da, si hän sogar freud gha und no tanzt zu unserer musig, das zeigt wider, dasses doch au toleranti Cliquefrinde git.
Noch däm mr es baar vo unsere gassehauer gspiilt hän isch denn aber leider würklich fascht schluss gsi und als letschts stückly hämer denn traditionellerwis s beeri ahgstumme.
Das isches denn leider au gsi,die 3 dääg sin wider wie im flug vrbi gange. Unsere major het sich härzlich bedanggt fir die glatti fasnacht, ahschliessend hed au no dr präsi s wort ergriffe und sich bi allne bedanggt bsunders unserem ushilfsmajor wo das tip top gmacht het.
Adiee frau fasnacht, ei troscht hets no gäh an däm morge, dr fein schingge mit ei. Am halb 6i am morge isch dr verfasser vo däm bricht denn heimegange, dorum blibe euch witeri storys erspart. Es pfiffe aber spatze vo de dächer, dass no e fraktion gmüesehändler gege 11i am morge torkelnd bim schiefe gsichtet worde sin. Gnauers chani leider nid drzue säge. Ich wünsch euch no e guete räscht und uf e glatte bummel am suntig.
